KUCHING: Perintah Sarawak minta Komiti Teknikal di baruh Kaunsil Pengatur Pejalai Sempekat Malaysia 1963 (MTPMA63) ditusun baru dikena mutar isu sektor pengerai enggau nyelian pengawa laun diadu betandu.
Sapit Premier Sarawak, Datuk Amar Profesor Dr Sim Kui Hian madah, tuju peminta nya nambah pemujur randau teknikal ari ngaul terus pengari kanan Opis Menteri Pekara Wang, Unit Perambu Ekonomi (EPU) enggau Opis Servis Perintah (JPA) ti nyadi raban ngaga pemutus.
Ku iya, tusun ke bisi diatu ngasuh isu bekaul pengerai suah tejanggal lebuh tanggungpengawa nya belidar entara agensi ti lalu enda teputar.
“Lebuh isu pengerai dikerandau, pekara tu suah agi nanya penemu JPA, EPU tauka Opis Menteri Pekara Wang. Aum suah udah diatur, tang pemutus tusah endar digaga laban raban megai pengawa nadai enggau betunga,” ku iya.
Iya nyebut pekara nya lebuh dirandau media pengudah bejadi pengawa nyerah kereban perubat pemun ngagai Klinik Pengerai Batu Kawa, Hari Tiga.
Berindik ari nya, iya madah ke Sarawak minta komiti nya betuaika Sapit Menteri Besai, Datuk Amar Fadillah Yusof nyadi raban supreme di baruh MTPMA63, kelebih agi mutar isu autonomi pengerai enggau bejalaika polisi.
Iya mega madah, tusun baru nya beguna endar ngambi Sarawak ulih ngatur pelin tunga kuing ti nyengala ungkup timpuh lima ngagai 10 taun dikena mutar isu suntuk pengereja pengerai, nyengkaum ba Hospital Besai Sarawak.
“Penanggul suntuk lutur enggau indu misi enda ulih diputar tekala nya. Kitai enda ulih ngambi beribu staf pengerai seretai.
“Pekara ti beguna iya nya perambu berenggat, latih berurun enggau nampung polisi nadai ngira sapa ti ngemudi pengawa,” terang iya.-EDISI UKAS
