PUTRAJAYA: Perintah Sarawak deka majak ngenegapka agenda pemansang Bumiputera ngena chara begempung ari meri perati ngagai pengawa ngerembaika dagang, pemansang pengelandik, belanja, akses makit enggau kaul dalam sektor besai empas.
Sapit Premier Sarawak, Datuk Amar Awang Tengah Ali Hasan madah, entara inisiatif besai iya nya langkar strategik 3-7-20 ke meri perati ngagai kompeni Bumiputera dipasuk ba rintai Bursa Malaysia, pemansang Regional Business Champions sereta ngangkat dagang mikro ngagai kompeni Sendirian Berhad.
“Entara inisiatif besai iya nya langkar strategik 3-7-20, ke meri perati ngagai kompeni Bumiputera dipasuk dalam rintai Bursa Malaysia, pemansang Regional Business Champions sereta ngangkat dagang mikro ngagai kompeni Sendirian Berhad.
“Langkar tu udah nurai pemujur besai lebuh United Asiapac Energy Berhad mujur dipasuk ba rintai Pasaran ACE Bursa Malaysia kena 14 September 2026, enggau puku makit RM192.50 juta sereta asil RM48.74 juta mujur diulih,” ku iya.
Iya nyebut pekara nya ba siti penerang Opis Menteri Dagang Antarabansa, Industri enggau Meranak Puku Sarawak (MINTRED) nengah Aum Komiti Pemandu Kaunsil Ekonomi Bumiputera Bil. 2/2026 betuaika Sapit Menteri Besai Dato Seri Dr Ahmad Zahid Hamidi di Putrajaya kena Hari Satu.
Iya madah, semilan da kompeni Bumiputera Sarawak udah dikelala deka dipasuk dalam rintai saham, nyengkaum dua ke diselinting taun 2027.
Kelimpah ari nya, Menteri MINTRED nya madah, Perintah Sarawak mega deka ngerembaika kaul Bumiputera ba sektor deras tumbuh baka hidrogen, petrokimia, kilang pemadu maju, aeroangkasa enggau semikonduktor, seriris enggau PCDS 2030.
Berebak enggau nya ku iya, Perintah Sarawak meransang pengawa begulai entara kompeni Bumiputera enggau ukai Bumiputera nengah dagang begulai, bekunsi teknologi, pemansang vendor enggau akses makit.
Ku iya, chara tu beguna endar dikena nempa ekosistem dagang Sarawak ke holistik, inklusif enggau ngenapka pengawa pangan diri, sereta ngasuh kompeni lokal ulih sama ngerembai ba rentayan bekal serantau enggau global.
Kelimpah ari nya, ku iya, pemansang pengelandik mega ditegap nengah TVET di CENTEXS, Sarawak Skills enggau kerejasama agensi Perintah Besai, seraya RM250 juta diagih dikena bejalaika Free Tertiary Education Scheme belabuh 2026.
“Nengah kerejasama rat entara Perintah Sarawak enggau Perintah Besai, sereta pengawa begulai tegut agi entara sektor perintah enggau peribit, Sarawak bisi juluk ati ngemansangka ekosistem dagang ke entap agi, inklusif enggau ulih besemekih, enggau mayuh agi kompeni lokal ulih ngerembai ke renggat serantau enggau global,” terang iya. — EDISI UKAS
