SIMUNJAN: Inisiatif pelajar tinggi pechuma ti deka berengkah dipejalai ba taun baru disadang nempa 10,000 nembiak landik renggat universiti setaun.

Premier Sarawak, Datuk Patinggi Tan Sri Abang Johari Tun Openg madah, semua nembiak ti ulih nampung pelajar tinggi ngagai institusyen ti diempu Sarawak enda ibuh mayar ungkus sekula sida laban perintah nengeri deka nanggung semua ungkus nya.

“Barang sapa anak ti bisi pengelandik ulih masuk universiti ti diempu Sarawak.

“Semua ulih masuk universiti nya enggau enda bebayar. Kami deka mantu sida mayar,” ku iya.

Abang Johari bejaku munyi nya rambau bejadi Pengerami Simunjan 2015 ba Taba Regata Pengerami Simunjan ditu, kemari.

Ku iya, ba bajet nengeri, bisi 10,000 iku nembiak taun keterubah dipelaba beungkus RM400 juta setaun.

“Ba taun kedua deka nambah 10,000 nembiak baru, nya ngujungka penyampau semua nembiak taun keterubah enggau kedua manggai 20,000 iku, ungkus nya nambah dua kali lipat nyadi RM800 juta ba taun kedua.

“Penyampau nya terus nyentuk ngagai taun ketiga, ke alai ungkus tu dipelaba sepenyampau RM1.2 billion,” ku iya.

Iya nyemetak madah, juluk timpuh panjai inisiatif tu iya nya deka nempa 10,000 graduet ungkup timpuh tiga taun berunggu, raban nya dilatih ngena penemu pemadu baru ngambika ulih nyaup ngemansang nengeri tu.

“Laban kitai enda tau enda ngelatih raban nembiak enggau penemu ti pemadu baru.

“Aku meda peluang anak Sarawak, enti dilatih sida ulih nampung pengawa sida,” ku iya.

Abang Johari mega minta komuniti ngetan penegap politik nyadi siti atur beguna ungkup pemujur program nya.

Iya ngingatka pengawa ngena media sosial patut ditegap ungkup tuju penemu ukai ngaga petenah.

Ku iya, pengawa bejalaika pelajar enda bebayar ngembuan tuju ngerembaika pemansang sereta nempa pengereja pengawa ti bepenemu ti ulih nyukung agenda pemansang Sarawak.