KUCHING: Sarawak nguna pengelebih ba pun pengeraja asal digempung ngena teknologi, penemu enggau injiniring dikena nempa tikas ekonomi ke tinggi agi sereta nyungkak pengulih nengeri tu besemekih.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, taja pia peluang ke besai agi iya nya bepanggai ba pengulih nengeri tu ngena teknologi enggau pengelandik.
Ku iya, Sarawak ngembuan macham pengelebih baka pun penatai pengeraja asal ulih dikena baru, infrastruktur digital ke majak moden, universiti, institusyen pemansik sereta industri tegap.
“Tu mega meri reti praktikal ngagai penemu ekonomi kilah menua.
” Pemujur ukai semina bepanggai ba akses teknologi, produk enggau servis ke digaga ba endur bukai tang bela deka nentu Sarawak nyendia produk pengelandik enggau inovasyen ngagai dunya, ” pia ku iya.
Iya bejaku munyi nya maya Pengerami Bejadi Konferens Ekonomi Digital Antarabansa Sarawak (IDECS) 2026 di Palan Konvensyen Borneo Kuching (BCCK), Hari Satu.
Nambah ka jaku iya, Datuk Patinggi Abang Zohari madah, pengering patut disegulai ngambi mujur agi alai teknologi ukai semina meransang penumbuh industri baru tang deka nyungkakka agi produktiviti sektor ekonomi.
Ku iya, tu deka ngembing Sarawak nyulut ba ekonomi ti ngerembaika agi pengulih diri datai ba dagang global.
Bela datai Sapit Premier Sarawak, Datuk Amar Profesor Dr Sim Kui Hian, Speaker Kunsil Nengeri (DUN) Sarawak, Tan Sri Datuk Amar Mohamad Asfia Awang Nasar, Menteri Utiliti enggau Telekomunikasyen Sarawak, Dato Sri Julaihi Narawi, Sekretari Perintah Sarawak, Datuk Amar Mohamad Abu Bakar Marzuki, raban Menteri enggau Sapit Menteri, Tuai Opis Perintah enggau bala pemesai ke bukai. — EDISI UKAS
