KUCHING: Ketegal ubah klimet nuntung dunya diatu, Perintah Sarawak deka nunda chara ngalih kuasa ti dikereja ex-tuai Great Britain, Winston Churchill.

Premier Sarawak, Datuk Patinggi Tan Sri Abang Johari Tun Openg madah, Winston Churchill udah mai pemujur ngagai Britain rambau Perang Dunya Kedua kelia.

Ku iya, tuai lumur satu Britain jeman nya udah nukar tauka ngalih pengawa ngena kuasa arang ngagai kuasa minyak.

“Lebuh Perang Dunya kedua, Churchill lebuh nya ngena kuasa minyak ari kuasa arang ngambi ulih nyeliahka diri agi kena pegai Jerman.

“Baka kitai ba Sarawak diatu ti ngalih ngagai kuasa hidrogen ari kuasa minyak, pekara tu seraris enggau ubah klimet dunya,” terang iya.

Abang Johari bejaku munyi nya lebuh Pengerami Makai Lemai Anugerah Konvensyen SCISCA serimbai ngintu Bulan Inovasyen Servis Opis Perintah Sarawak 2023 ba sebuah hotel ditu malam tadi.

Iya madah baru, nya endang juluk perintah nengeri ngangkatka Sarawak nyadi pemansut kuasa ulih dikena baru ba Rantau tu baka dikereja Winston Churchill.