Sarawak ngerikod 60 kes baru dirampit Covid-19

KUCHING: Pelilih Kanowit bebali ari status gadung ngagai status kuning pengudah ngerikod dua kes seraya Pelilih Meradong bebali ngagai status gadung pengudah nadai ngerikod kes ba timpuh 14 hari ke udah.
Komiti Penyangga Penusah Nengeri Sarawak (JPBNS) madahka Kluster Pasai nambah 48 kes tadi ngujungka semua kes ngaul kluster nya nambah ngagai 510 kes.
Chairman iya, Datuk Amar Douglas Uggah Embas madahka JPBN udah ngaga ngeluarka Atur Pengawa Standard (SOP) Atur Mindah Betagang (PKP) deka dikeluarka Kaunsil Pengelikun Menua (MKN) Sarawak dalam portal MKN ( http://www.mkn.gov.my ).
Ku iya, SOP nya diterit ba Bagi Menua Sibu tengah malam tu, pukul 12.01 pagi nyentuk 11.59 malam 29 Januari tu.
Uggah mega madahka Sarawak sehari tu ngerikod 60 kes positif baru Covid-19 iya nya 43 kes di Sibu, Miri (10) enggau Kanowit (dua) ngujungka kes nambah ngagai 1,980 kes.
“Bisi enam kes udah suman enggau dikemendar pansut ari sepital ke alai tiga kes ari Sepital Besai Sarawak (SGH), dua kes ari Sepital Miri enggau siti kes ari Sepital Sibu.
“Penyampau kes ti udah suman nambah ngagai 1,137 iku tauka 57.42 peratus.
“Urung 822 iku agi diperubat ba wad isolasyen iya nya 484 kes di Sepital Sibu, 193 kes di Sepital Miri, 100 kes di SGH enggau 35 kes ba Sepital Bintulu.
“Bisi dua kes benung diperubat ba Unit Sakit Raya (ICU) di Sepital Miri seraya 141 PUI baru dirikodka enggau 43 PUI agi nganti pemutus makmal,” terang Uggah.
Naka tu, tujuh kluster agi ngerekai ba Sarawak iya nya Kluster Bukit Sekubong di Sebauh, Kluster Jelita di Miri, Kluster Pasai di Sibu, Kluster Keranji Tabuan di Kuching, Kluster Bah Sayap di Miri, Kluster Stutong di Kuching enggau Kluster Mador di Meradong.