JAKARTA: Rentayan penyambung fizikal, kuasa enggau digital ti tegap dikelala nyadi pemun pemansang serantau ba Borneo.
Premier Sarawak, Datuk Patinggi Tan Sri Abang Johari Tun Openg madah, nya ngangkatka Sarawak nyadi bakih strategik ti nyungkak pemansang begulai Indonesia enggau kandang menua sepiak.
Ku iya, Sarawak diatu ransing meranak puku besai ba pemansang infrastruktur, utiliti enggau telekomunikasyen.
“Tu nyengkaum negap rentayan pengangkut enggau logistik ari ngempung sistem pengangkut darat, pengawa ngaga padang bilun antarabansa baru sereta penyangkai kapal tasik dalam baru ti nangkup guna industri ti majak mansang.
“Menua sepiak kami ngembuan penyangkai kapal pemadu besai ba Kalimantan, iya nya Peyangkai Kapal Antarabansa Kijing, ti nyadi pintu penama tasik dalam ungkup Kalimantan.
“Tu mega bisi pengulih megai tanggungpengawa besai ti ngenap pengawa penyangkai kapal di Sarawak.
“Ngena chara begulai, pemansang penyangkai kapal tu nyendia peluang penyangkai kapal ti bela ngenap pengawa sereta kaul penyauh ti efisyen agi ngagai Asia Timur, Timur Tengah enggau Eropah,” ku iya.
Abang Johari madah munyi nya lebuh bekunsi penemu ba Indonesia Economic Summit (IES) 2026 ditu, kemari.
Iya madah, tanggungpengawa Penyangkai Kapal Antarabansa Kijing di Kalimantan mega nyaup penyangkai kapal di Sarawak, lalu nyadi rentayan kapal ‘jauh pejalai’ ti efisyen agi ngagai Asia Timur, Timur Tengah enggau Eropah.
“Sambung baru penerebai terus entara Kuching enggau Pontianak ukai semina ngemuntang jalai nengah langit tang kelai pemujur kaul meraka entara menua Borneo.
“Reti nya, mensia mayuh lantang mindah, penemu sereta dagang, kelimpah ngerichah dagang, dagang temuai, pelajar sereta kerejasama dagang.
“Ba semangat ti sama, Sarawak udah numbuh AirBorneo dikena negap kaul langit serantu sereta ngerembai kaul ari palan bukai selampur dunya,” ku iya.
Ngenang bekaul kuasa, Abang Johari madah ke pengulih besai Borneo ba kuasa ulih dikena baru diatu nerima perati dunya.
“Sarawak nyaup momentum tu nengah kerejasam rat enggau Indonesia nyengkaum projek pemansang hidro begulai di Kalimantan Utara enggau bakih ari Indonesia.
“Kerejasama tu mandangka baka ni Borneo ngemansangka kuasa beresi nengah pengawa bekunsi rembus entara menua ti praktikal,” ku iya nerang.
Ngenang juluk Borneo manggai 2030, iya madah ke pemansang Nusantara nyadi indu mengeri baru Indonesia deka nyungkak pemansang ekonomi selampur pulau nya.-EDISI UKAS
