KUCHING: Sarawak diatu udah angkat nyadi siti kandang menua ti mansang betuai ke Premier Sarawak, Datuk Patinggi Tan Sri Abang Johari Tun Openg.
Tuai Pemegai Menua (TYT) Nengeri Sarawak, Tun Pehin Sri Dr Wan Junaidi Tuanku Jaafar madah, taja empai sebaka enggau menua ti mansang baka Singapore, Jipun, Kuala Lumpur, Pulau Pinang enggau Korea Selatan tang Sarawak nyengala benung nuju baka menua ti disebut nya nengah Strategi Pemansang Pengudah COVID-19 (PCDS) 2030
. “Pemansang Sarawak nyerangkung ekonomi enggau penatai pemisi tinggi ke alai Sarawak berati ke sektor baru baka kuasa gadung, ekonomi digital enggau industri teknologi moden kelimpah pemansut ari minyak enggau gas.
“Kelimpah ari nya, juluk nambah penatai pemisi per kapita peranak menua ngambi sebaka enggau menua bepenatai pemisi tinggi, ke deka nyungkak tikas idup rayat enggau chara ti komprehensif,” ku iya ba pesan khas kemari serimbai ngintu Hari Krismas 2025 enggau Taun Baru 2026.
Iya madah, Sarawak mandangka pemansang ba sains enggau teknologi sereta kuasa ulih dikena baru lalu pengeransing diatu deka nempa Sarawak nyadi Bateri ASEAN nengah eksport kuasa gadung ngagai menua sepiak.
kelimpah Perintah Sarawak meranak puku ba pengawa berumah enggau nyeruri jalai tebing tasik, jematan enggau rentayan jalai bukai nyadi penyambung.
Ba pengeransing nuju kandang menua mansang, iya mega berati ke akses enggau kualiti pelajar dikemanah nyengkaum numbuh sekula antarabansa enggi perintah enggau inisiatif bantu pelajar tinggi pechuma ngagai nembiak Sarawak, lalu meruan ngena Jaku English nyadi batang jaku.
Ku iya, pekara pengerai mega diperati nengah nyeruri fasiliti pengerai ti lama, kelebih agi ba kandang menua ulu sungai, dikena nentuka semua rayat Sarawak bulih servis pengerai ti manah agi.
Ba pekara wang ku iya, atur belanja ti nyulut ari Perintah Sarawak mandangka pemujur tikas kredit ti manah ke alai Agensi tikas kredit pekara wang Malaysia, RAM Ratings enggau MARC Ratings, konsisten mandang pengawa ngaku sub-berdaulat Sarawak ba tikas AAA enggau prospek entap.
“Pengawa ngaku tu disukung penuduk fiskal ti tegap lalu Sarawak dipelaba ngembuan rizab tunai ti besai, sepenyampau RM26.9 bilion ba ujung taun 2023,” ku iya.
Iya madah, kerejasama rayat enggau Perintah Sarawak nyadi kunchi pemansang enggau pengentap Sarawak. Ku iya baru, enti nadai sukung tegut rayat ba nyaup semua perambu enggau polisi Perintah Sarawak, nya deka meri penanggul ngagai kandang menua tu nempa status nyadi kandang menua mansang enggau lantang ba taun 2030. — EDISI UKAS
