BETONG: Perintah Sarawak udah mantaika peminta lisin ungkup bank digital di menua tu ari Bank Negara Malaysia (BNM).

Kepala Menteri Datuk Patinggi Abang Johari Tun Openg madah, semua pengawa bank udah tu ila deka nengah chara digital.

“Kitai udah ngaga peminta lisin numbuhka bank digital ngagai BNM ketegal semua pengawa diatu ngena chara baru.

“Dikemendarka tauka enda, bedau temu…tang kitai nguji,” ku iya bejaku maya bejadika Pengerami Ngelancharka Tiang Pemanchar enggau Servis Telekomunikasyen Smart 300 di Luban Ulu, kemari.

Ku iya, peranak di menua tu udah tebuka runding sentang pekara ngena digital.

“Aku meda orang Sarawak landik ngena teknologi baru, ambika chunto maya Atur Tagang Pejalai (PKP) ketegal Covid-19, sida ngena teknologi baru ngemuntangka pengawa ninting hari.

“Di Sibu, pengawa jual beli sayur ba Pasar Central Sibu udah nguna Sarawak Pay enda ngena mata duit agi,” ku iya.

Berebak enggau nya Adun Layar Gerald Rentap Jabu lebuh ditanya sentang pengawa ti digaga Abang Johari madahka pekara nya endang engkeman.

“Nya runding panjai siku ketuai tu manah.

“Kebuah pia, laban pemansang teknologi diatu enggau servis bank digital majak ditemu orang,” ku iya.

Rentap ngarapka peminta nya dikemendarka BNM, laban bank digital nya ila mesti ngembuan undang-undang dikena ngelindung penguna enggau piak bukai.