KUCHING: Presiden Gerempung Tinju Nengeri Sarawak (SABA), Datuk Rahman Lariwoo nyemetak madah, Sarawak udah nyikap ngatur Pekit Tinju Gerempung Besai Asia (ASBC) 2025 ti deka diatur ba bulan June taun baru.
Iya madah, pekara nya udah dibantai ngagai Gerempung Besai Tinju Malaysia (PTM) sereta nerima timbal manah ari sida.
Taja pia, ku iya, nya pen enti Malaysia mujur dipilih nyadi tuai rumah ungkup ngatur pekit besai nya ti deka ngempung 46 menua.
“Kitai (Sarawak) udah mantai pekara tu ngagai PTM ngambi pekit nya diatur di Kuching enti Malaysia mujur dipilih nyadi tuai rumah ngatur pekit nya ila lalu gerempung nya nerima manah perambu nya.
“Naka diatu, raban PTM benung bejalaika inisiatif ungkup tuju nya enggau ngerebut peluang berega nya.
“Pemutus nya deka ditemu ba bulan Januari tu ila,” ku iya rambau dirandau Arena Suara Sarawak.
Terang iya, enti pekit nya diatur di Kuching, nya siti kredit ungkup Sarawak kelebih agi SABA laban ulih mantaika penau bala peninju lokal ti deka besemekih ba pekit ti besai agi.
Pia mega, ku iya, nya ulih negapka agi pemansang lumba tinju Sarawak ti komprehensif.
“Abis nadai pekit tu ngemataka bala peninju lokal besemekih enggau pengari ari menua bukai,” ku iya.
