MIRI: Raban polis sikar ngemuntan penyalah enchuri kabel ba Marina lalu ukai semina mujur ngetan siku saspek tang mega nyeliah penanggul bekal kuasa karan tejanggal ti ulih ngeruga pengelikun mensia mayuh.
Tuai Polis Pelilih Miri, ACP Mohd Farhan Lee madah, ba operasyen asil penerang mensia mayuh nya, Unit Pansik Penyalah Indu Opis Polis Pelilih (IPD) Miri enggau kerejasama Polis Bantu Sarawak Energy Berhad (SEB) mujur ngetan siku lelaki peranak menua beumur 30-an ba endur nya, ditu kemari.
“Pengawa meresa silik ngujungka kami mujur ngerampas sekeda kereban dikena ngempat kabel kelimpah tetemu ke kulit kabel ti udah dikeliti sereta sekeda gulung kabel,” ku iya.
Ku iya, penyalah enchuri kabel ukai semina kes enchur aja tang mega ulih meri empas besai ngagai bekal kuasa karan enggau pengelikun peranak lokal.
Ku iya, ulah nya ngujungka penanggul bekal kuasa karan kelimpah ngeruga pengelikun mensia mayuh kelebih enti kabel ti dikempat agi aktif.
Iya nyemetak madah, Polis DiRaja Malaysia (PDRM) keran neritka atur ba sebarang ulah ngenyai reta tengkira mensia mayuh enggau enda belembut ngagai sida ti ngereja penyalah nya.
“Atur deka diterit ngagai sida ti nyalam penyalah nya tauka meli barang dichiri ti dipechaya asil ngereja penyalah nya.
“Nya alai, mensia mayuh dipinta terus meri penerang ngagai raban polis nyema tetemu ke aktiviti ti nyelai kelebih agi ba endur ti bisi fasiliti utiliti mensia mayuh nentuka pengelikun komuniti enggau bekal kuasa karan semampai dijaga,” ku iya.
