SIBU: Sebuah kolej teknikal ti diperambu ditumbuh ditu deka nempa mayuh agi pengereja pengawa landik kelebih agi dalam bidang teknikal baka welding enggau ngaga entukar, ku Datuk Seri Wong Soon Koh.
Kaban Kunsil Nengeri (ADUN) Bawang Assan ti mega Mandal Presiden Kanan Parti Demokratik Progresif (PDP) nya madah, Gerempung Besai Pengempu Bengkel Entukar Malaysia (FAWOAM) ti betuai ke presiden baru sida, Penghulu Teo Nging Poh benung chakah negika pengawa numbuhka kolej nya.
“Aku bisi dipadah Gerempung Ngadu Entukar Sibu (SARA) ti bela betuai ke Penghulu Teo bisi meri sebidang tanah enam ikar pemesai ungkup tuju nya.
“Ba baruh embing iya (Teo) ti bepenau, kitai engka deka meda pengawa numbuhka kolej teknikal ditu.
“Business Events Sarawak (BESarawak) iya nya siti gerempung pemansang enggau ngelakuka dagang ba baruh Opis Menteri Dagang Temuai, Industri Kreatif enggau Seni Pemerindang engka deka meri sukung tegut.
“Nya kebuah Penghulu Teo benung chakah negika pengawa numbuh kolej tu ngambi ulih dikeamat.
“Tu siti pekara ti dikearap kitai lalu engka ba taun 2026 tauka 2027, kolej teknikal tu deka berengkah dipejalai tang naka diatu, pekara tu benung diperambu,” ku iya.
Wong mansutka jaku nya rambau bejadi Pengerami Makai Lemai serimbai Program Angkat Sumpah Komiti Eksekutif FAWOAM Penggal Ke-13 (2024-2026) sereta Komiti Eksekutif SARA Penggal Ke-23 (2024-2025) ditu, malam ensanus.
Program nya bela ngerami genap taun ke-45 SARA ti digulu Sapit Yang di-Pertua Dewan Rakyat, Alice Lau Kiong Yieng enggau temuai dipebasa bukai.
