SEMILAN taun pengudah menang lumba Formula One (F1) kepenudi di Litar Antarabansa Sepang (SIC) ba taun 2017, Max Verstappen sekali da nurai sejarah lebuh F1 Gulf Air Bahrain Grand Prix in Malaysia 2026. Pelumba Red Bull Racing nya nempa pemujur ba lumba 55 idar enggau rikod 1 jam 47 minit 14.808 sikin, ngenulu pelumba ti kala nyadi champion dunya,
Kimi Antonelli ari Mercedes AMG Petronas nengah pengelebih 2.307 sikin, lalu Lewis Hamilton ari Ferrari bulih penuduk ketiga, 4.919 sikin di belakang pemenang.
Nya mega pemujur keterubah Verstappen enggau Red Bull Racing musin tu, kelimpah nempa pemujur keterubah ungkup unit kuasa Red Bull Ford Powertrains. Verstappen madahka pemujur nya besai reti pengudah tim iya napi pemar enggau bebendar belumba.
“Lumba tu besai reti ba kami, musin keterubah chukup mayuh pemar lalu bendar besemekih. Kami bebendar gawa sepanjai taun kami mereti ke penanggul enggau nambah pemanah injin entukar lalu ujung minggu tu semua bejalai enggau chukup manah,” ku iya. Ku Verstappen, gaya lumba ti berubah belama begunaka strategik engkeman kelebih agi milih tayar.
“Lumba chukup mar enggau mayuh pemutus meseti digaga nyengkaum lebuh milih tayar ti engkeman.
“Mayuh pengasai ati kelebih agi tu pemujur keterubah ngena injin kami empu,” ku iya.
Verstappen dulu meri gerah bekaul pengelaju iya pengudah bulih sitak keterubah nengah rikod 1 minit 35.130 sikin, seraya Hamilton bepun di sitak kedua enggau Antonelli di sitak ketiga pengudah penalti grid diberi ngagai Isack Hadjar.
Tang, pelumba Belanda nya lenyau penuduk lebuh Antonelli enggau George Russell ari Mercedes laju agi.
Udah nya, Verstappen bebendar ngempu penuduk pemadu atas lalu pemujur nya nentuka Verstappen menang dua lumba F1 bejurut ti diatur di Sepang pengudah iya mega menang Grand Prix Malaysia 2017.
Ba taun 2017, Verstappen ti baru berapa hari ngintu hari pengada ke-20 mujur ngalahka Hamilton enggau Daniel Ricciardo lalu sekali tu, pemujur datai enda lama pengudah iya ngintu hari pengada ke-29.
Antonelli mega ngaku penuduk kedua nya pemutus pemadu manah ti ulih dijapai Mercedes taja iya bisi ngenulu lumba nya ba idar keterubah.
“Ba aku, penuduk kedua nya pemutus pemadu manah ulih dijapai kami. Tabi puji nuju Max enggau Red Bull.
“Ba kami, agi tubah pengawa ti patut dikereja dikena nambahka penyulut lalu aku tetap gaga bulih penuduk kedua,” ku iya.
Ku Antonelli, iya belabuh meda peluang menang pengudah ngepun lumba tang Verstappen ngelih baru pengudah lumba ditampung baru. Hamilton enda nyangka bulih penuduk ketiga pengudah ngaga pemutus ngena tayar lichin ba pun lumba ngujungka iya ba penuduk ke-17 enggau lebih seminit ba belakang entukar bukai.
“Mayuh utai diasai laban kami bisi peluang tang enda ngena enggau manah. Aku mega enda nyangka tau bulih penuduk ketiga,” ku iya.
Sepang endang tebilang nyadi entara litar pemadu mar ari sukut fizikal enggau teknikal laban napi gaya hari embap, angat sereta engka bisi ujan. Litar sepanjai 5.543 kilometer nya ngatur baru lumba F1 pengudah kepenudi diatur ba taun 2017 ke alai lumba taun tu diatur nyadi Formula 1 Gulf Air Bahrain Grand Prix in Malaysia
