MIRI: Sekretari Perintah Sarawak Datuk Amar Mohamad Abu Bakar Marzuki udah datai ngabas pengawa kepenudi nyikap Program Sarawakku Sayang 2026 di Stadium Miri, Hari Satu.
Iya datai meda pengawa nya sebedau program belabuh ari 24 ngagai 26 April tu ila.
Penatai iya lebih agi deka meda pengawa ngaduka panggau besai enggau ngabas palan program pemandang ari macham agensi enggau opis perintah.
Kelimpah ari nya, pekara bukai bela dikemerat iya nya bekaul pengelikun mensia mayuh sereta pengawa teknikal bekaul.
Program Sarawakku Sayang Sitak Miri disadang matak penatai urung 20,000 iku mensia mayuh ari Miri kelimpah dipebala bela deka digulu mensia mayuh ari Baram, Sibuti, Bintulu enggau Brunei.
Program dipadah deka dipenyadi Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg kena 25 April tu di Stadium Miri.
Bela datai maya ngabas palan nya, Sapit Sekretari Perintah Sarawak (Adminstresyen) Datu Felicia Tan, Residen Sitak Miri Galong Luang enggau Direktor Unit Komunikasi Awam Sarawak (UKAS) Awang Putrayusrie Awang Redzuan. — EDISI UKAS
