Sempekat komersial Sarawak-Petronas deka ditanggam 7 Disember tu

KUCHING: Sarawak deka nempa sejarah baru pengudah Perintah Sarawak nanggam sempekat komersial enggau Petronas kena 7 Disember tu ila.

Chairman Komiti Perunding Nengeri, Datuk Amar Mohammad Asfia Awang Nasar madahka, sempekat deka disain kena 7 Disember tu ke alai Perintah Sarawak diarika Sekretari Perintah Sarawak, Datuk Amar Jaul Samion seraya Petronas diarika Chairman iya, Tengku Muhammad Taufik Tengku Aziz.

“Pekara ke silik agi pasal sempekat tu deka dikeluar pengudah sempekat tu disain.

“Pengawa besejarah nya deka diatur ba Kualu Lumpur enggau dikemata Kepala Menteri Datuk Patinggi Abang Johari Tun Openg sereta Menteri Besai Tan Sri Muhyiddin Yassin,” ku iya meri penerang, kemari.

Nambahka nya ku Asfia, Perintah Besai, Perintah Sarawak enggau Petronas setuju mutarka isu bekaul enggau chukai jual nengeri sereta pemutus Perintah Sarawak ngatur pengawa ngali minyak ba Sarawak bepelasarka undang-undang nengeri ba bulan Mei tu tadi.

Ku iya, pekara tu deka diputar lalu ukai ngena atur undang-undang.

“Berebak enggau nya, Petronas enggau Perintah Sarawak bela narit pulai kes saman ba kort ba bulan Ogos tu tadi.

“Udah nya, Perintah Besai numbuhka Komiti Begulai betuaika Menteri Kanan Infrastruktur enggau Menteri Wang ngambi ngemuntangka pengawa berandauka pekara tu,” terang Asfia.

Ku iya, pengudah berandauka pekara tu silik agi enggau Perintah Sarawak, Opis Menteri Wang enggau Petronas setuju enggau syarat dalam tu.

“Nya alai, Komiti Perunding Nengeri diberi penerang pasal Sempekat Komersial ti disetuju entara Perintah Sarawak enggau Petronas.

“Licha nya dikenatai pengari Perintah Sarawak ngaul randau enggau Petronas,” ku iya.

Nangkankan nya ku iya, Komiti Perunding udah nemu pasal syarat enggau pekara dalam Sempekat Komersial sereta pengelebih ti deka diterima Sarawak dalam sempekat nya nengah aum kemari.

Suara Sarawak