Semua Kaban Parlimen PH meseti datai baum 8-9 April

KUCHING : Rang undang-undang bekaul enggau ubah Perkara 1 (2) Konstitusyen Perintah Besai deka dibantai ungkup bacha keterubah ari 8 nyentuk 9 April tu.

Sapit Menteri Dagang Dalam Menua enggau Pekara Bebeli Barang Chong Chieng Jen madah, pekara bekaul enggau Perkara 1 (2) KonstitusyenPerintah Besai deka dibantai lalu dipetalat ba sesi keterubah dalam sesi lima minggu aum parlimen tembu bulan April.

Iya madah, tesau udah dianjung nuju semua Kaban Parlimen PH meseti datai ba aum Parlimen kena 8 enggau 9 April.

“Ngelama tu, tiga minggu keterubah endang fokus ngagai meri penemu enggau meri timbal sentang Jaku Yang di-Pertuan Agong,” ku iya maya ditanya pemberita pasal Perkara 1 (2) Konstitusyen Perintah Besai, kemari.

Kenu ku Chong, dipelaba minggu baru deka bisi bacha keterubah pasal rang undang-undang ke endang isi Perkara 1 (2) Konstitusyen Perintah Besai.

Ubah tu, ku iya betuju ngubah status Sarawak enggau Sabah ari ‘nengeri’ nyadi bakih kunsi ke sebaka enggau Semenanjung Malaysia.

“Pengudah rang undang-undang dibacha ungkup keterubah ba Parlimen, nyadi nya deka ditangkan enggau resolusyen,” ku iya.

CHONG CHIENG JEN