PUTRAJAYA: Bantu Bepungkal Sekula (BAP) sepenyampau RM150 deka diberi ngagai genap nembiak Primari Satu nyentuk Pom Enam dikena ngelempung tating belanja apai indai nyerumba sesyen besekula baru.
Menteri Besai, Datuk Seri Anwar Ibrahim madah, bantu nya deka diberi ba timpuh seminggu nyentuk dua minggu.
Iya madah, apai indai meseti datai ke sekula dikena nentu bantu nya dikena enggau manah ungkup guna pelajar bala anak.
“Ba timpuh seminggu dua tu, apai indai deka nerima BAP sepenyampau RM150 ungkup genap nembiak berengkah ari Primari Satu nyentuk Pom Enam.
“Penatai apai indai ke sekula beguna ngambi bantu tu amat dikena enggau manah ungkup pelajar bala anak,” ku iya.
Anwar bejaku munyi nya rambau bejaku ba Program Meri Pesan Taun 2026 Opis Menteri Besai ditu, kemari.
Tampung iya, nya sebagi ari inisiatif perintah nentu pelajar terus ditampung sereta nambah akses pengawa belajar ti bekualiti di selampur menua.
Nangkan nya, iya bela nesau agih belanja khas ungkup nyeruri sekula vernakular sepenyampau RM80 juta diberi ngagai Sekula Primari Bansa China (SJKC) lalu RM50 juta diberi ngagai Sekula Primari Bansa Tamil (SJKT).
“Agih belanja tu deka dikena ngemanahka agi fasiliti sekula, nambah kualiti ngajar sereta nyendia gaya belajar ti kondusif agi.
“Perintah betati ke guna sekula vernakular ti kurang diberi perati sebedau tu lalu taun tu kitai deka nentu semua sekula nyengkaum SJKC enggau SJKT bulih pemaik,” ku iya.
Iya nyemetak madah, nya seriris enggau inisiatif perintah negap pelajar ba renggat tumu kelimpah mantu ruang bilik napi ungkus pelajar ti majak nambah.
