BINTULU: Sepital kedua patut digaga lengkas ba Bintulu lalu Perintah Besai patut ngemerat pekara nya laban komuniti sereta aktiviti ekonomi ba mengeri industri minyak enggau gas nya majak nambah.
Sapit Premier Sarawak, Datuk Seri Dr Sim Kui Hian madah, sepital ti endang udah bisi enda ulih ditangkir agi.
Iya madah, taja pen nya endang tanggungpengawa Perintah Besai tang ketegal penyiru ngagai rayat, Perintah Sarawak naka ulih ngamat pekara nya.
“Kitai patut ngelala taba ti engkeman dikena nirika sepital kedua lalu rambau pandemik COVID-19 taun nyin kemari, sepital ti endang udah bisi disilih nyadi sepital COVID-19.
“Kami beterima kasih ngagai sepital peribit ti udah meri bantu.
“Tu meh kebuah pengawa numbuhka sepital kedua tu beguna amat,” ku iya rambau bejadi Begunan Cardiopulmonary Assessment Suite ba Sepital Bintulu ditu, ensanus.
Iya madah, raban sida benung chakah nagih kuasa autonomi pengerai baka dalam Sempekat Malaysia 1963 (MA63).
