SERIAN: Bagi Menua Serian ngembuan pengulih besai nyadi tibang pemakai, bepelasarka pengawa bumai, betanam enggau nupi jelu, sejalai enggau pemansang ti benung diasaika Sarawak diatu.
Penyanding Penemu ba Opis Menteri Dagang Antarabansa, Industri enggau Meranakka Puku (MINTRED), Datuk Sri Naroden Majais madah, pengulih besai ke dikembuan kandang menua nya ulih dikena nentuka pengelikun pemakai nengeri sereta ngangkatka penatai pemisi peranak menua nya nengah sukung ke majak diberi Perintah Sarawak.
Ku iya, Sarawak diatu benung ngasai ke pemansang asil ari perambu enggau pelin strategik perintah, ti ukai semina nyungkak ekonomi nengeri, tang mega muka mayuh agi peluang ngagai raban bansa menua pesisir ngambi ulih ngasaika penguntung ari pemansang nya.
“Serian ngembuan pengulih besai dalam pengawa bumai, betanam enggau nupi jelu.
“Nengah sukung ti diberi Perintah Sarawak, kandang menua tu ulih ngerembai nyadi tibang pemakai ke beguna amat dikena nyamin bekal pemakai nengeri sereta ngangkatka penatai pemisi peranak menua,” ku iya.
Naroden bejaku munyi nya ba Pengawa Merut Kirasah SK Sejijag serimbai Pengerami Gawai 2026 ba Balai Mayuhguna Kampung Sejijag, Plaman, Tebedu, empai lama.
Ba pengawa nya, iya mega meri agih belanja penyampau RM3,000 ngagai Gerempung Apai Indai enggau Pengajar (PIBG) SK Sejijag dikena nyukung pengawa sekula enggau pengelantang nembiak.
Kelimpah ari nya, Komiti Pemansang enggau Pengelikun Genturung Pendiau (JKKK) Kampung Sejijag mega nerima agih belanja RM20,000 dikena ngemujurka pengawa pemansang komuniti sereta pengawa ke mai penguntung ngagai peranak menua nya.
Naroden ngarapka kerejasama rat entara perintah enggau raban bansa terus ditegapka agi dikena nentuka agenda pemansang Sarawak ulih dipejalai enggau mujur, lalu mai pemansang ke meruan sereta ngangkatka pengelantang pengidup rayat.
Sama bisi datai ngulu pengerami nya, Kaban Kunsil Nengeri (ADUN) Tebedu, Dr. Simon Sinang Bada; Sapit Residen Bagi Menua Serian, Abdul Khalid Manap; Kepala Pengajar SK Sejijag, Pemancha Kane Manung, Penghulu Donny Achan enggau Tuai Rumah Antonio Tingui.
Pengerami nya mega digulu urung 250 iku peranak menua. – EDISI UKAS
