Seruran dedat, ‘nadai utai ke nadai’

SIBU: ‘Nadai utai ke nadai’ pia ku munyi jaku engkeman nyemaka Makit Sentral Sibu ti ninting hari dedat ditapatka mensia.

Ari macham bansa pemakai, lauk babas tauka asil ari kampung nyentuk ikan enggau undang, makit tu mega tebilang nama ketegal barang ke dijual dia bisi enda kala dipeda ba menua bukai.

Tembu dalam taun 1996, diatu makit ti dipadahka pemadu besai di menua Malaysia tu bisi lebih 1,000 iku orang bedaja.

Dibagi ngagai dua ringkat alai ringkat atas endur kedai makai enggau kedai bejual gari.

Di baruh semampai dipeda dedat endur mensia mayuh bebelika barang pemakai lebih agi maya ujung Minggu tauka maya musin buah.

Iya ke dipeda ngasuh makit tu tebilang nama kelimpah dikelala enggau pemesai iya, maya bejalai ke makit tu kitai ulih meda barang ke dijual endang baru datai magang baka ikan enggau undang sigi baru diulih pungka bisi nya agi idup.

Jam diatu, nyauka ujung musin buah, buah baka isau, uchong enggau rembai mengkang agi mayuh dijual.

Sayur semampai baru enda ngira sayur ke ditanam tauka asil ari kampung.

Sida ke bejual ditu mega ukai semina orang Sibu tang bisi datai ari Kapit, Song, Kanowit, Julau, Bintangor sereta menua ke besemak ke bukai.

Bisi mega sida tu endang sigi bejual di menua bukai tang datai bejual ba makit nya ngulihka untung agi enti dibida enggau menua diri.

Tu tau dipeda maya musin buah alai sida ke bejual datai ari menua bukai taja rega baka buah dipadahka dijual enggau murah agi.

Kelimpah ari nya, bala pemesai ke kala datai ngagai makit tu iya nya ex-Menteri Besai Datuk Seri Najib Razak.

Kepala Menteri Datuk Patinggi Abang Johari Tun Openg enggau bini iya Datuk Amar Juma’ani Tuanku Bujang bela kala meli barang ba makit tu.

TEMEDAK
Makit Sentral Sibu
TINJAU : Gaya rampa makit Sibu diperati ari atas.
NYAMAI : Undang agi baru dijual ba Makit Sentral Sibu.
BUAH PAKAN : Buah pakan tauka buah nyekak agi bisi dijual ditu.
TEKUYUNG : Mayuh bansa tekuyung bisi dijual ba makit tu.
TUBAH : Buah kemayau agi tubah dijual ba di makit tu.