Servis bas hidrogen pechuma agi bejalai taja sebuah bisi penanggul teknikal

KUCHING: Sarawak Metro Sdn Bhd (Sarawak Metro) agi neruska servis bas hidrogen pechuma ba mengeri tu taja siti ari bas ke dipenggi serikat nya bisi penanggul teknikal.
Nengah sebenglah penerang Sarawak Metro madahka, sebuah bas hidrogen sida enda ulih dikena laban bisi penanggul teknikal mimit.
“Taja pia penanggul nya enda ngeruga timpuh ngujika servis bas nya baka ke udah ditaga sebedau tu,” ku penerang ari Sarawak Metro nya.
Ba penerang ke sama, Sarawak Metro mega madah deka bejalaika atur ti patut ngambika servis bas nya mengkang terus bejalai.
“Taja pia, kami sigi enda nguna bas ke ditemu bisi penanggul laban nangika penanggul ke enda disadang laban diatu agi dalam timpuh nguji lalu kami meri jamin servis bas pechuma deka terus dipejalai ba mengeri tu,” ku iya.
Ku iya, Sarawak Metro benung mutarka penanggul nya lalu andal pekara nya ulih teputar nengah bantu ari Foshan Feichi Automobil Manufacture Co., Ltd (Feichi) di China, taja sida enda ulih datai tubuh ke Kuching ketegal pangka pandemik Covid-19.
Operasyen ngujika bas hidrogen diatu agi dipejalai nitihka taga musin mengeri tu nyentuk ke Damai.
Servis bas hidrogen pechuma ba Kuching nya asil inisiatif begulai Opis Menteri Perengka Pengangkut enggau Opis Pemansang Ekonomi Sarawak (SEDC) enggau bepun bejalai ngena tiga buah bas kenyau Januari 2020.

Suara Sarawak