KUCHING: Opis Pengangkut Sarawak (MOTS) merambu ngaga arung khas ungkup perengka pengangkut mensia mayuh baka bas ba mengeri dikena nyendia servis ti ngasi.
Menteri MOTS, Datuk Seri Lee Kim Shin madah, iya ngelempai pengandal ati ngagai penguna bas sereta meransang sida ngena perengka pengangkut mensia mayuh ti disedia.
Ku iya, taja pen statistik penguna perengka pengangkut mensia mayuh agi baruh tang nya bisi nambah pengudah Perintah Sarawak bejalaika inisiatif bas tambang RM1.
“Inisiatif tu dipejalaika nengah agih belanja RM10 juta dikena ngurang ke tambang perengka pengangkut mensia mayuh.
“Kitai chakah deka ngemadaska agi servis dikena meri pengelantang ngagai penguna perengka pengangkut mensia mayuh ba Sarawak.
“Opis menteri mega merambu nyendia arung khas ungkup semua perengka pengangkut mensia mayuh.
“Kebuah pia ngambi enda mengkang ba penyekut jalai alun kelimpah ulih datai ba palan ti dituju nitih ke jam ti udah ditaga.
“Kitai belemati ke entukar Transit Aliran Autonomi (ART) ngembuan arung khas ngambi pejalai entukar tu lanchar lalu nitih ke jam ditaga,” ku iya.
Kim Shin nibar jaku nya lebuh dirandau pemberita pengudah nemuai ngagai Taman Trafik Kenyalang, ditu kemari.
Iya madah, raban sida deka mansik perambu infrastruktur jalai alun ba Sarawak nengah pengawa nyendia arung khas ungkup entukar mensia mayuh ngambi datai ba palan dituju baka ti udah ditaga. -EDISI UKAS
