KUCHING: Kaunsil Lisin Entukar Dagang (LPKP) Sarawak bejalaika inisiatif proaktif ngemoden industri teksi nengah pengawa mantai sistem tambang bepelasarka aplikasyen e-hailing.
Chairman LPKP Sarawak, Michael Kong Feng Nian madah, inisiatif nya dikena mutar penanggul nadai nguna meter teksi ti udah lama ngeruga industri nya.
“Teksi ngesan pangku pengawa besai dalam rentayan pengangkut nengeri tu kelebih agi nyadi orang keterubah ditapat temuai ti datai di Sarawak.
“Nya alai, pengelurus ati enggau enda bechiping ba pengawa netap tambang beguna amat dikena ngeranchakka agi industri dagang temuai enggau ekosistem pengangkut mensia mayuh nengeri tu,” ku iya ba sebengkah penerang kemari.
Iya madah, LPKP Sarawak bejalaika inisiatif proaktif berandau enggau pengatur e-hailing baka Grab, MyCar, Maxim enggau AirAsia Rides dikena nyerungkai integrasyen guna meter teksi dalam aplikasyen sida.
“Inisiatif tu deka meri pemaik ngagai deriba teksi beoperasyen nengah pelasar ti ulih diatur, lurus ati enggau bepelasarka teknologi.
“Tu mega meri pemaik ngagai rega servis ti enda bechiping, akses ngagai palan penguna ti besai agi sereta sukung sistem ti moden enggau kemas agi ari pengatur e-hailing,” terang iya.
