KUCHING: Bangkai siku nembiak lelaki dipelaba lenyau ba Kampung Simpok Jalai Padawan kena Hari Empat tu tadi udah ditemu ba sungai enda jauh ari endur kepenudi iya dipeda.
Nitihka penerang ari Palan Operasyen Bomba Sarawak, lelaki benama Mac Aloysius, 25 taun, bansa Bidayuh lalu siku Orang Nyelai Pendiau (OKU).
“Piak pematau Siburan udah nerima kangau ari Alice urung pukul 3 lemai ti madahka penusah siku nembiak lelaki dipelaba lenyau.
“Tudah diripot nadai mulaika ke rumah pengudah iya dipeda bemain ba jematan ba menua sida dia,” ku penerang nya.
Bangkai tudah ditemu ba sungai urung 7km ari PKB Bomba enggau endur kepenudi niang dipeda sida semenua, urung pukul 10 pagi lalu udah diserah ngagai piak polis ungkup pansik silik.
