TANJUNG MANIS : Siku nembiak lelaki dipelaba lenyau ditagup baya maya ngiga tekuyung ba Sungai Tanjung Manis ditu pagi tadi.
Tudah ke lenyau Ricky Ganya, 14, ari Rumah Dadat, Tanjung Manis dipadahka nurun ngiga tekuyung enggau ibu iya rambau penusah nyadi.
Palan Operasyen Bomba Sarawak madah, raban komiti udah berumban ngesah palan penusah pengudah nerima kangau tasah pukul 11.28 pagi tadi.
“Palan Komiti Operasyen (PGO Sarawak) nerima kangau tasah ari MERS 999 lalu ngerah ngagai raban ari Tanjung Manis ngelawa palan nya.
“Kelimpah ari ibu iya, tudah nembiak tu bela diuluka dua iku agi bakih iya. Nitih penerang, sida tepedaka siku baya narit tudah ke dalam ai,” ku iya.
Penusah tu kedua nyadi pengudah siku lelaki lenyau dipelaba ditagup baya ba Sungai Seduku enda jauh ari rumah panjai Tuntun, Sri Aman, dua hari ke udah.
Tudah maya penusah nyadi benung nimba ai dalam perau ke deka dikena berikan. Naka berita tu ditulis tudah ke lenyau agi digiga mensia mayuh enggau raban penyelamat.
