Simunjan mali kuning, nadai zon gadung agi ba S’wak

KUCHING: Sarawak nadai agi pelilih menua ba status gadung pengudah Pelilih Menua Simunjan ngerikodka siti kes positif Covid-19 sehari tu.

Komiti Penyangga Penusah Nengeri (JPBN) dalam siti penerang media tadi madahka nya ngujungka Pelilih Menua Simunjan bebali ngagai status kuning.

Penerang nya mega madahka Pelilih Menua Bau bebali ngagai status mirah ari status oren pengudah ngerikodka 45 kes positif dalam timpuh 14 hari.

Berebak enggau nya, Sarawak ngerikodka tiga kluster baru iya nya Kluster Sungai Tengah, Bau, Kluster Sungai Sebemban, Bintulu enggau Kluster Sebujok, Sri Aman.

Taja pia, bisi empat kluster ditukuka punas iya nya Kluster Jalan Tanjung, Bintulu, Kluster Jalan Tanjung Kidurong, Bintulu, Kluster Jalan Merpati, Miri enggau
Kluster Rajang, Tanjung Manis pengudah nadai ngerikodka kes positif baru dalam timpuh 28 hari.

Naka diatu, penyampau kluster positif Covid-19 ti agi ngerekai ba Sarawak bisi 78 kluster.

Ari 78 kluster ti agi ngerekai, 19 kluster bisi ngerikodka 219 kes baru positif kemari ke alai 59 kluster ke bukai nadai nambah.

Suara Sarawak