Sinu : Rumah panjai Semawa Ulu, Pantu angus lengis lemai tadi

PANTU: Tinggal empat hari agi deka ngintu Gawai Dayak 12 pintu peranak Rumah Annie William ba Kampung Semawa Ulu, Pantu, Sri Aman begawai enggau sinu ati pengudah rumah sida nyadi abu ba penusah angus lemai tadi.

Pemantu Direktor Operasyen, Opis Bomba enggau Penyah Penusah Malaysia (JBPM) Sarawak, Tiong Ling Hii madah sida nerima kangau urung pukul 2 lemai.

“Lebuh nerima kangau telefon sida madah semilan buah pintu rumah panjai nya udah angus laban api.

“Palan Gerakan Operasyen (PGO) lalu ngerah Balai Bomba enggau Penyelamat (BBP) Sri Aman ngesah sida ti dituntung penusah angus nya,” ku iya.

Pengudah datai ba lokasyen jam tiga lebih Ketuai Operasyen PBK II Jilin Itar madah 12 buah pintu rumah panjai Semawa Ulu angus lengis.

Maya berita tu ditulis, nadai diripotka orang bebadi nyawa ketegal penusah tu lalu raban BBP Sri Aman benung ngereja pengawa ke patut nulung peranak menua nya.

“Pia mega sida benung mansik penerang ari semua ruang bilik ti kena tinggang penusah nya kena nyidi nama kebuah rumah panjai nya angus,” ku Tiong.

ANGUS LENGIS…Rumah Panjai Annie ba Kampung Semawa Ulu, Pantu, Sri Aman angus lengis.

Suara Sarawak