SJKC Chung Hua Bako dibuka 2021

KOTA SAMARAHAN: Didiri ba sitak palan pengentap ti dedat, Sekula Bansa China (SJKC) Chung Hua Bako ba Taman Berlian ditu disadang dibuka taun baru (2021).

Chairman Kaunsil Pengatur Sekula Bansa China Bagi Menua Kuching, Samarahan enggau Serian, Jonathan Chai Voon Tok madah, sekula ti didiri beungkus lebih ari RM6 juta nya diungkup ngagai lebih ari 100 iku nembiak.

“Taja pia, kami nerima belanja RM3 juta ari Perintah Sarawak lebuh ngentak baru begunan sekula nya seraya belanja bukai nya pemeri komuniti China.

“Nya alai, kami ngarapka komuniti China ti besemaya mantu sebedau tu ulih nganjung duit laban penyampau ke patut dibayar ngagai kunterikor bedau abis dibayar,” ku iya.

Jonathan mansutka jaku nya ngagai pemberita Suara Sarawak pengudah ngabas begunan SJK Chung Hua Bako begulai enggau Menteri Kaunsil Kandang Menua enggau Pengawa Berumah Datuk Seri Sim Kui Hian, ditu sehari tu.

Ku Jonathan, sida diatu benung ngulihka ‘sijil kelulusan jalan’ enggau permit ‘pendudukan’ (OP) ari piak bekaul.

“Nya alai, kami ngarapka sijil kelulusan jalan enggau OP ulih dikeluar ujung bulan tu.

“Pengudah kededua dokumen nya ulih diambi, kami deka nganjung dokumen nya ngagai Opis Menteri Pelajar Malaysia (KPM) ngambi diisi Kepala Pengajar enggau bala pengajar,” terang iya.

Iya mega madah, pengawa ngaga begunan sekula nya lanchar dipejalai enggau nitihka perambu.

Ngelansa pasal sejarah ngaga sekula nya, Jonathan madahka sekula tu dikemendar pindah ari Bako ngagai Kota Samarahan lebuh Perintah Besai dipegai Barisan Nasional (BN) suba.

“Baa um kabinet lebuh nya, sekula tu dikemendar pindah ngagai Kota Samarahan enggau saup ari Kui Hian.

“Nya alai, kitai ngasaika sekula tu endang dipinta peranak ditu laban didiri ba palan pengentap ti dedat,” terang Jonathan.

Suara Sarawak