ENGKILILI: Sekula Primari (SK) Ijok ditu kena tuntung penusah ampuh bah pagi tadi.
Penusah ampuh nya nyadi berindik ari ai pasang raya lalu ditangkan enggau ujan bangat.
Nitihka penerang ari Penghulu Henry anak Kudol, penusah ampuh bah ba SK Ijok nya bisi dua kaki penalam lalu ngujungka jalai nuju ka sekula mega putus.
“Taja diatu ai bisi udah surut tang kami mengkang irau ai laban nangi ka ai niki baru laban ai agi pasang besai,” ku iya madah ngagai Ruai Suara Sarawak, lemai tu tadi.
Nangkan ke nya, iya madah mayuh mega rumah panjai ba pelilih Engkilili kena tuntung penusah ampuh bah kelimpah ari SK. Ijok baka Rumah Tengak, Basi Ili enggau Rumah Maria, Merebong.
“Nasip diatu sekula agi pulang laban bala nembiak ke be malam ba buding bedau nurun besekula,” ku iya.
Berebak enggau nya, Penghulu Henry ngelalau mensia mayuh di Pelilih Engkilili lebih agi ke diau semak sungai terus bejejaga.
Iya mega ngarapka ejensi tauka raban opis perintah bekaul seruran matau kandang menua ke suah kena tuntung penusah ampuh bah.
