KUCHING: Kaunsil Multimedia Sarawak (SMA) deka nambahka bungkur Rentayan Arus Penyambung Menua Pesisir Deras (Rural High-Speed Open Broadband Network) ngagai 11 sitak di Sarawak ba taun 2025.
Menijar Besai SMA, Datuk Dr Anderson Tiong madah, 11 sitak nya di Gedong, Sebuyau, Simunjan, Asajaya, Lingga, Sadong Jaya, Beting Maro, Saribas, Bukit Saban, Layar, enggau Sungai Asap.
“Ba suku keempat 2024, kami temegah ati madah ke bungkur 5G ba kandang menua mayuh mensia udah manggai 63.8 peratus, seraya bungkur 4G ba sitak pengentap pendiau manggai 84.8 peratus di Sarawak.
“Kitai meri besai terima kasih ngagai Digital Nasional Berhad (DNB) laban udah nyendiaka infrastruktur 5G di Sarawak,” ku iya.
Anderson bejaku munyi nya rambau Pengerami Makai Lemai Taun Baru China 2025 SMA ba sebuah hotel kena malam tadi.
Iya madah baru, SMA mega meri terima kasih ngagai Operator Rentayan Telefon (MNO) baka Celcom-Digi, Maxis, U Mobile, enggau Telekom Malaysia ti udah bekerejasama enggau sida nyendiaka rentayan telekomunikasyen ti beguna amat ungkup rayat Sarawak.
