KUCHING: Sistem bebayar enda ngena duit SPay Global nyingkang jauh agi lebuh nyendia perengkaguna bayar Interoperable QR di baruh pelasar DuitNow ari PayNet.
Premier Sarawak, Datuk Patinggi Tan Sri Abang Johari Tun Openg madah, servis tu nyendia belanja ti endang bisi 24 jam seminggu ke alai duit nya ulih dikredit tekala nya ngagai penerima.
Iya mega madah, nyentuk sehari tu, SPay Global udah ngerikod transaksyen sepenyampau RM4.2 bilion sereta 770,000 penguna enggau 91,000 orang dagang berejister.
“Ungkup jeman ke mua, SPay Global deka disikap ngena perengkaguna Cross Border QR ngambi raban temuai menua luar baka Indonesia ulih bebayar ngena aplikasyen ti nadai ngena duit enggau e-dompet ti semina ngena chara scan kod QR DuitNow maya ngusung Malaysia.
“Tu siti inisiatif ti manah ngagai ekonomi wilayah Sarawak laban status pengerembai ekonomi di Pulau Borneo kelebih agi lebuh indu menua Indonesia deka dipindah ari Jakarta ke Nusantara di Kalimantan,” ku iya.
Teks jaku Abang Johari nya dibacha sapit iya, Datuk Amar Douglas Uggah Embas rambau bejadi Karnival Pintar Pekara Wang ba sebuah palan bebeli barang ditu, kemari.
Ku iya, dikena nentuka nadai orang tinggal dalam agenda ekonomi digital enggau pekara belanja, Perintah Sarawak nengah kerejasama Bank Negara Malaysia sereta institusyen pekara wang bisi bejalaika servis bank mindah kin kitu dikena ngemuntangka peranak menua pesisir ba taun 2021.
“Naka diatu, bisi lapan unit bank mindah kin kitu ti nyendia servis pekara wang di 24 palan di menua pesisir di Sarawak,” ku iya.
