KUCHING: Projek Jalai Penyambung Sarawak Sabah (SSLR) Renggat Satu diatu tembu 52.27 peratus naka April 2025 lalu disadang tembu suku keempat taun 2026.
Menteri Infrastruktur enggau Pemansang Penyangkai Kapal ti mega Sapit Premier Sarawak, Datuk Amar Douglas Uggah Embas madah, ungkup Renggat Kedua SSLR, projek nya udah berengkah dipejalai ba semua pakej nyengkaum nyungkur taba, kereja tanah enggau parit ke alai diatu udah tembu 0.93 peratus lalu disadang tembu suku ketiga taun 2029.
“Naka diatu, JKR Sarawak benung bejalaika 213 projek beungkus RM3.29 bilion, nyengkaum 77 projek nengah Langgur Pelan Boleh Pinda Kelima.
“Tu berindik pengawa ngaku JKR Sarawak nyadi Opis Teknikal nengah AP182 ba taun 2023 ngambi bejalaika projek Perintah Besai berega RM50 juta enggau ke baruh,” ku Uggah lebuh nyimpul jurai opis menteri iya ba Aum Kunsil Nengeri (DUN), ditu tadi.
Ari semua projek nya, tujuh udah tembu, 22 benung digaga seraya 184 da agi ba renggat pra kunterik.
