INDUN SILONG
suarasarawak.sv@gmail.com
KUCHING: Kaunsil Dagang Temuai Sarawak (STB) ngatur Sempekat Pemereti Ati (MoU) enggau World Wide Fund for Nature – Malaysia (WWF-Malaysia) dalam pengawa ngintu rampa menua.
Ba sebengkah penerang media STB madah ke MoU nya ungkup betuju ngelakuka pakej bepelasarka rampa menua enggau ekodagang temuai seraya nyukung pengawa ngintu kampung bakau enggau mamalia tasik ti beguna amat di Sarawak disain sehari tu.
“Kerjasama nya numbuhka langkar kolaboratif ungkup pemansang enggau ngelakuka ekodagang temuai ti ngempu tanggungpengawa.
“Nya fokus ngagai kandang endur projek WWF-Malaysia, kelebih agi DELTA Rajang-Belawai-Paloh di Tanjung Manis, pelilih menua ti tebilang enggau biodiversiti.
“Nya mega nyengkaum kampung bakau enggau spesis mamalia tasik, kelebih agi dolphin Irrawaddy,” ku penerang nya kemari.
Ku penerang tu baru, kerejasama tu nguji deka nyeimbai pengawa ngintu enggau pemansang ekonomi ti dipejalaika komuniti.
Direktor Pengintu WWF-Malaysia, Dr Henry Chan madah ke kerejasama enggau STB nya peluang ti manah dikena nyambung pengawa ngintu enggau ekodagang temuai ti meruan.
Ku iya, Delta Rajang-Belawai-Paloh nyadi palan biodiversiti ti nyelai.
“Nengah kerejasama tu, kami ngarapka ulih nerenakka penyedar ti besai agi sereta nyukung peluang pengidup ti meruan sereta meri penguntung ngagai rampa menua enggau komuniti ti bepanggai ba nya,” ku iya.
Nengah MoU tu, STB enggau WWF-Malaysia deka nyapai kerejasama ngemansangka dagang temuai bepelasarka rampa menua, ngemansang sereta nguji pakej ekodagang temuai ti ngemeratka biodiversiti seraya nerenakka kaul komuniti enggau daya idup ti meruan.
Kelimpah ari nya, kaul tu mega deka meri kuasa ngagai komuniti baka ngangkatka pengelandik enggau kapasiti ngatur ekodagang temuai enggau meri fokus ngagai dagang bepelasarka komuniti.
Sida mega deka ngemeran pengawa ngatur kolaboratif baka meransang kerejasama entara komuniti enggau raban dalam ngatur sereta ngelakuka inisiatif eko-dagang temuai.
Kerejasama kepenudi iya nya ngangkatka penyedar kelebih agi ngasilka kereban komunikasyen dikena mandangka pengawa ngintu sereta ngelakuka dagang temuai ti ngempu tanggungpengawa ngagai peranak menua enggau temuai.
Inisiatif tu ngembuan tuju deka nyikap komuniti enggau raban komuniti enggau pengelandik ti diguna dikena ngatur ekodagang temuai enggau meruan sereta manah.
Nengah chara tu, STB enggau WWF-Malaysia ngembuan juluk deka ngelakuka chara ti beserakup ba pengawa ngintu enggau pemansang ti meruan, nentuka ekodagang temuai ngerembai seraya nyaga pesaka asal Sarawak.
