KUCHING: Sarawak bisi siti da produk baru ti ulih diserungkai dikena mansutka kuasa gadung iya nya strain yis mirah, nyau deka 70 peratus nyadi minyak.
Nya alai Premier Datuk Patinggi Tan Sri Abang Johari Tun Openg madah, nadai mayuh orang nemu pasal yis nya ti kala digumpul seraban pemansik ari Afrika Selatan (University of Free State, Republic of South Africa) ari tanah ba Mukah dalam taun 1994.
“Berapa taun ke udah, sebuah serikat minyak enggau gas tebilang bisi ngerandau kami laban deka mansik yis tu ungkup pemansang biofuel.
“Engka tu peluang manah ngagai Palan Biodiversiti Sarawak (SBC) ngidupka baru pengawa mansik yis tu nyadi pilih bukai dikena ngaga biofuel,” ku iya.
Abang Johari nyebut jaku nya nengah teks jaku dibacha Menteri Pelajar, Inovasyen enggau Pemansang Penau, Datuk Roland Sagah Wee Inn serimbai Pengerami Makai Lemai Ngintu Genap Taun Ke-25 SBC ba Palan Konvensyen Borneo Kuching (BCCK), tadi.
Iya madah, komuniti menua pesisir enggau menua ulu nyentuk ke Ba’Kelalan enggau Bario udah meri pemujur ngagai SBC kenyau ari 25 taun pengudah ditumbuh, lebuh meri sanding penemu beguna endar ba pengawa mansik dipejaika SBC.
“Penemu sida pasal utai tumbuh ti tau dikena nyadika ubat tauka pemakai ulih dikomersial lalu dikena ngaga pemakai tambah ti ukai semina meri nutrisyen aja tang nyadi ubat,” ku iya.
