SARIKEI: Sukung penuh rayat Sarawak beguna amat ngambi perintah ulih nerus agenda pemansang ba nengeri tu, ku Sapit Menteri Pengeraja Asal enggau Pemeruan Rampa Menua, Datuk Seri Huang Tiong Sii.
Iya madah, pemansang besai Sarawak kemaya hari endang berebak ari pengeransing perintah ti betuaika Premier Sarawak, Datuk Patinggi Tan Sri Abang Johari Tun Openg kelimpah nentu tunga kuing rayat jemah lantang enggau tejamin agi.
“Rayat deka bulih pemaik ari pengeransing perintah ngemujur agenda pemansang nengah pengawa bejalaika bemacham projek enggau inisiatif baru.
“Inisiatif betampung tu dikena nentu rayat ngasaika pengelikun enggau pengelantang,” ku iya.
Tiong Sii mansutka jaku nya rambau Pengerami Ngabang Aidilfitri ti diatur Parti Pesaka Bumiputera Bersatu (PBB) Repok ba Balai Mayuh Guna Kampung Seberang ditu, ensanus.
Ba lansa bekaul, ku iya, musin pengerami endang engkeman ungkup semua bansa nambah penemu ngelala adat, main asal, gaya idup enggau pengarap bansa bukai.
Gaya lantang nya, ku iya, ulih mantu negapka penyerakup pupu bansa kelimpah nyadi reta beguna menua ti patut ditan.
“Sarawak ukai semina dikelala nyadi sebuah wilayah ti angkun ba pemansang sosial enggau ekonomi tang tebilang enggau pengelantang pupu bansa.
“Kitai ulih meda sida idup begulai, seruran bekerejasama enggau mantu pangan diri.
“Penyelai tu nempa Sarawak nyadi chunto semangat penyerakup ti lantang ba Malaysia,” ku Kaban Parlimen Sarikei ti mega Kaban Kunsil Nengeri (ADUN) Repok nya.
