KAPIT: Sitak Sungai Tunoh di Bukit Mabong dikelala bisi pengulih besai dikemansang nyadi bumai padi bedandang besai dikena negap jamin bekal pemakai ba Sarawak.
Sapit Menteri Digital ti mega Kaban Parlimen Hulu Rajang, Datuk Wilson Ugak Kumbong begulai enggau Menteri Industri Pemakai, Komoditi enggau Pemansang Kandang Menua Sarawak, Datuk Seri Dr Stephen Rundi Utom udah ngabas pengulih pemansang sektor bumai padi chara komersial dia.
Ku Wilson, palan pengentap di Tunoh enda ditumbuh ba timpuh pandak tang ngembuan jerana sejarah kenyau ari urung taun 1971 pengudah endur nya belabuh diserungkai ungkup aktiviti betanam betupi berindik ari tanah ti ami sereta engkeman endur bumai padi.
Berebak enggau nya, iya merambu skim padi endur nya ulih ngena teknologi pintar dikena nambah asil sereta produktiviti orang bumai.
Sama datai, Sapit Menteri ba Opis Premier Sarawak (Undang-undang enggau Adat Bumiputera) ti mega Kaban Kunsil Nengeri (ADUN) Bukit Goram Datuk Jefferson Jamit Unyat, sereta Kaban Kunsil Nengeri (ADUN) Pelagus Wilson Nyabong Ijang. — EDISI UKAS
