KUCHING: Sarawak bisi pengulih besai ba pengawa nyerungkai kuasa gadung baka hidrogen.
Duta Besai Sweden ke Malaysia, Tuan Yang Terutama (TYT) Niklas Wiberg madah, Sarawak besai pangku pengawa ba idar kuasa kelebih agi ba industri kuasa gadung.
Ku iya, nengeri tu bisi pengulih besai nyerungkai kuasa gadung baka hidrogen ti diguna menua nya.
“Sweden bisi lebih ari 100 serikat di Malaysia lalu tebal agi serikat tu meri perati ngagai industri kuasa gadung.
“Serikat besai Sweden tu baka ABB, SKF, Volvo Trucks, Ericsson, Scania, Alfa Laval enggau Atlas Copco.
“Semua serikat besai tu bisi siti utai sebaka, sida mayuh agi meranak puku ba idar kuasa gadung.
“Sida sedia bekerejasama enggau ngeremnbaika agi pengawa meranak puku lalu nambahka kaul enggau Sarawak,” ku iya.
Niklas nyebut jaku nya lebuh dirandau pemberita pengudah ngatur penemuai basa ngagai Premier Sarawak, Datuk Patinggi Tan Sri Abang Johari Tun Openg ba Wisma Bapa Malaysia, pagi tadi.
Iya madah, batang tuju penemuai sehari nya mega dikena ngerumban kerejasama bejalaika projek begulai enggau Sarawak.
Berebak enggau nya, Abang Johari mega bisi nerima penemuai basa ari raban Affin Bank Berhad ti betuai ke Direktor Affin Bank Berhad Wilayah Sarawak, Victor Liew Wui Tak.
Nangkan nya, raban betuai ke Datuk Bandar Majlis Bandaraya Miri, Adam Yii Siew Sang mega bisi nemuai kia enggau tuju berandauka projek rayat di sitak Miri.
