KUCHING: Taman Negara Loagan Bunut ngembuan pengulih besai diangkat nyadi produk eko dagang temuai ba Malaysia kelebih agi Sarawak.
Residen Bagi Menua Miri, Jamalie Busri madah, palan nya patut dibantai nyadi produk nyelai ba bagi menua Miri.
Ku iya, pekara nya seraris enggau eko dagang temuai ti majak tebilang ba sukut dagang temuai sereta dikerindu mensia mayuh kemaya hari tu.
“Tu mega seraris enggau Pelin Besai Dagang Temuai Sarawak Ketiga 2021-2035 ti dipejalai setipak enggau Strategi Pemansang Pengudah COVID-19 (PCDS) 2030.
“Pekara tu dikena nyuman sereta ngemansang sektor dagang temuai ba timpuh pandak enggau timpuh panjai.
“Setipak enggau juluk perintah nengeri ti deka nempa Sarawak nyadi palan besai eko dagang temuai enggau pengawa dagang ba rantau ASEAN manggai 2030, pengawa ngemansang Taman Negara Loagan Bunut ngembuan pengulih diangkat nyadi siti produk eko dagang temuai ti nyelai ba Miri,” ku iya.
Jamali mansutka jaku nya rambau nyempulang raban Opis Pengatur Pengawa Bagi Menua Miri nemuai ngagai Taman Negara Loagan Bunut ditu, empai lama.
Taman Negara Loagan Bunut urung 120 kilometer (km) penyauh ari Mengeri Miri nya diberi nama bepelasar ke nama Tasik Loagan Bunut ti semak dia ti nyambung Sungai Bunut, Sungai Baram sereta Sungai Tinjar.
Taman negara nya mungkur sitak 100 km persegi pemesai ti tebilang enggau bemacham utai idup sereta ekosistem ai ti nyelai.
Palan nya udah digazet kena 1 Januari 1990 lalu dibuka ngagai mensia mayuh kena 29 Ogos 1991.
