KUCHING: Agih belanja Program Transformasyen Menua Pesisir (RTP) patut ditambah ari RM5 juta ngagai RM7 juta setaun, ku Kaban Kunsil Nengeri (ADUN) Lingga, Dayang Noorazah Awang Sohor.

Iya madah, nya berebak ari ungkus dikena bejalaika projek ti majak niki nyengkaum rega barang enggau upah pengereja pengawa ti majak niki.

“Ambi ke chunto, sebedau tu, ungkus projek ngaga jematan mit, projek ngaga sistem parit, balai komuniti, pengkalan orang berikan enggau palan main futsal beungkus entara RM250,000 nyentuk RM350,000.

“Tu nyau enda engkeman agi laban ungkus dikena ngaga projek nya diatu dipeleba ulih manggai RM500,000 nyentuk bejuta ringgit.

“Pekara tu ulih dipeda rambau sesyen nyabut undi ungkup projek RTP ti dipejalaika kitai sereta bisi sekeda projek ditulak bala kunteriktor lalu diatu status projek nya ‘No Taker’,” ku iya.

Noorazah mansutka jaku nya rambau aum Kunsil Nengeri (DUN) ditu, sehari tu.

Pia mega, iya bela ngemerat Projek Perambu Ngaga Selapat Bah ba Pasar Lingga patut diperati perintah sereta dipejalai dikena mutar penusah bah ba sitak nya ti nyadi genap kali musin landas.

Ku iya, projek ti beungkus RM90 juta nya udah dipinta Opis Parit enggau Entali Ai (DID) Bagi Menua Sri Aman berengkah ari taun 2021 suba tang nyentuk diatu agi bedau nerima pemendar agih belanja ari Perintah Sarawak enggau Perintah Besai.

“Projek tu endang dianti komuniti ba Pasar Lingga laban ninting taun rambau musin landas, semua pengentap ba enam buah Kampung Melayu, sekula primari, masjid, surau enggau Opis Pelilih Lingga napi penusah nya.

“Ukai naka nya aja, penusah nya ngujung ke sekeda jalai besai putus lalu peranak Lingga enda ulih pansut tauka tama ngagai Pasar Lingga,” ku iya.