KUCHING: Tambang bas Kuching-Serian bisi berubah ketegal servis nya ngambi bagi Program Transformasyen Servis Bas Berenggat (SBST), ti dipejalai Biaramas Express Sdn Bhd ngena chap dagang BAS.MY.
Ubah nya berengkah dipejalai ari bulan April 2025, lalu subsidi tambang RM1 diketu.
Opis Menteri Pengangkut Sarawak (MOTS) ba sebengkah penerang kena Hari Empat madah, pekara nya sebagi ari pengawa bejalaika SBST, ti dipelanja Perintah Besai pengelama lima taun dikena ngemanah sistem bas ngetu-ngetu di Kuching.
Kelimpah ari pejalai Kuching-Serian, semilan da pejalai bukai ti deka belidar ngagai SBST chara berenggat manggai Mei 2025.
Pejalai nya nyengkaum Taman Malihah, Bako, SMK Matang Jaya, SMK Agama Matang 2, Kampung Benuk Homestay, SJK Chung Hua Batu Kawa, King Centre, Muara Tebas enggau Terminal Bas Bau.
Ari bejalaika SBST, tambang subsidi RM1 ba pejalai nya deka diketu lalu disilih enggau sistem tambang MyBas50, ti meri pas pejalai nadai betatak semina RM50 sebulan.
Ba pengawa ngangkatka pengangkut mensia mayuh ngelantangka penguna, bala nembiak, orang tuai enggau orang nyelai pendiau (OKU) deka ngasai pejalai pechuma nengah program nya.
Taja pia, ba endur ti enda disengkaum dalam SBST, Program Subsidi Tambang Rata RM1 agi diterus nentuka perengkaguna pengangkut mensia mayuh ti ulih dibayar terus diasai ke rayat, kelebih agi raban kurang penatai pemisi (B40).
