TAMU Bandar Riyal, Kota Samarahan entara palan ti suah bededat ditapatka mensia mayuh ti ngelingi tu.
Palan nya ukai semina tebilang ba Kota Samarahan tang tebilang ba selampur Kuching enggau sitak ti ngelingi tu.
Kebuah pia laban bemacham bansa lauk bisi didaja ba Tamu Bandar Riyal dia nyengkaum lauk basah enggau lauk rangkai.
Mensia mayuh ti ngelawa palan nya sigi enda pulai enggau jari puang nyentuk sida bekeringku bebaika barang dibeli diri dia.
Entara bansa sayur ti bisi didaja dia baka kemiding, paku, changkuk, daun empasa, sayur manis, retak, buah entekai, tubu, peria, genuk enggau ti bukai.
Ukai naka nya aja, bemacham bansa buah bisi didaja dia baka nanas, pisang, empelam, semangka, limau, rungan, buah kuini, temedak enggau mayuh agi ti bukai.
Kelimpah ari nya mayuh bansa ikan tasik enggau sungai baka pari, sardin, tungkul, tengiri, gembung, lumi, keli, suntung, undang, tilapia enggau patin bisi dijual dia.
Nambahka nya, mensia mayuh bepeluang bebelika bemacham kuie enggau pemakai panggang ba tamu dia.
Pengudah lelak tauka ikak bebelika lauk ba Tamu Bandar Riyal, mensia mayuh ulih ngetu belelak ngirup ai enggau makai bemacham bansa pemakai ba Premier Food Court ba sepiak tamu nya.
Tamu Bandar Riyal bela dikelingi mayuh supermakit tebilang baka Farley, Sen-Sen, Everwin, Top Mart enggau BB Supermarket.
Pekara nya meri pemaik ngagai sida ti bedaja ba tamu nya laban sida ti bebelika barang ba sebelah supermakit ngelingi nya deka singgah bebelika lauk ba Tamu Bandar Riyal.
