KUCHING: Parti Rayat Sarawak (PRS) patut nentu kaul entara tuai ti lama enggau baru ditanggam manah dikena nyeliah penanggul pambar dalam parti.
Berindik ari penutus Presiden PRS, Datuk Joseph Salang Gandum ti enda ngetan penuduk iya ba pengawa bepilih ti deka datai sereta meri sadang penemu Mandal Presiden PRS, Datuk Seri John Sikie Tayai mangku penuduk nya. Penganalisis Politik, Dr Lee Kuok Tiung madah, pengawa Salang nyurutka diri ari penuduk Presiden PRS nya deka mai ubah ari sukut pengelebih enggau strategi parti nya.
“Taja pia, aku enda ngadang bisi ubah besai nyadi dalam PRS.
“Bala tuai ti baru patut nerang pasal visyen enggau kuing parti nengah pengawa ngaul kaban renggat baruh kelimpah ngenuku komitmen sida ngagai Gempung Parti Sarawak (GPS) sereta bakih parti gempung ti bukai nyadi penegap parti sida,” ku iya lebuh dirandau Suara Sarawak kemari.
Dr Lee madah, taja pen nya muka ruang ngagai sekeda ubah tang pemutus bala tuai parti nya nyukung Mandal Presiden PRS, Datuk Seri John Sikie Tayai nyadi chalun Presiden nyengala bisi tampung ba PRS.
“Penerang ari Salang nya mandangka b i s i pengawa tebuka enggau akauntabiliti lebuh iya mantaika juluk diri ti deka meda parti nya mansang ke mua ba baruh embing tuai ti baru,” ku iya.
Ngenang pasal empas ari pengawa bepilih nya ngagai Pengawa Bepilih Nengeri (PRN) Sarawak ti disadang diatur ba taun baru, Dr Lee enda mantah engka bisi empas ngagai parti nya kaban timpuh nyikap diri napi PRN chukup serekat.
Taja pia, ku iya, PRS enda napi penanggul besai laban penegap GPS ulih nentu penegap ba parti komponen.
“PRS enda bepanggai ba tikas pengulih orang kediri tang ba konsensus begulai.
“Parti tu bela nerima sukung tegut ari GPS kelimpah ngembuan struktur organisasyen penuh lalu bala tuai ti bepenau ba kaunsil supreme, raban nembiak enggau indu ti aktif sereta renggat baruh ba semua sitak,” terang iya.
Tampung iya, rurun dalam parti mega deka nentu pengawa betukar tuai nya lanchar sereta enda ngeruga penyikap sida napi PRN.
Dulu ari nya, Salang madah ke iya deka nyurut ke diriba pengawa bepilih parti nya ti deka datai pengudah baum enggau tuai kanan PRS. Iya madah, nama Sikie udah dipilih nyadi penganti sereta nerima sukung tegut rambau pengerami makai lemai di Bintulu kena 22 Ogos tu tadi serimbai Roadshow Aum Besai Tiga Taun Sekali (TDC) PRS.
Tampung iya baru, Sikie enggau ati baruh nerima manah nama iya dichalun ungkup penuduk presiden parti sereta bedanji bejalaika pangku pengawa iya enggau manah nyema mujur dipilih ba TDC ila.
Nangkan nya, Kaban Kaunsil Supreme PRS, Wilson Nyabong Ijang rasmi madah ke diri deka bediri minta pilih ungkup penuduk presiden parti kelimpah disadang nyura pengawa bepilih ti deka diatur.
