BETONG: Enam pintu bilik Rumah Bantan, Sungai Langit ba Ulu Layar ditu begau dini hari tadi ketegal penusah tanah tusur.

Nitihka penerang ari Palan Operasyen Bomba, piak Opis Bomba enggau Penyah Penusah (BBP) Betong nerima kangau ari Dr Richard Rapu urung pukul 8 pagi tu bekaul penusah ke nyadi.

“Nitihka penerang, penusah nyadi bepun ari ujan bangat ba sekeda ngujungka tanah dia tusur.

“Urung 87 kaki pemanjai enggau 40 meter penalam endur tanah tusur ba laman rumah sida ngujungka rumah stor enggau dua tanju runtuh ditabanka tanah,” terang iya.

Penusah ke nyadi tu ukai semina ngeruga pengelikun sida enam pintu nya aja tang mega sida Bantan serumah bela berasai irau.