Bejalai meda pemanah pantai, ngasaika ribut ti lundai muput enggau mendingka bunyi gelumbang ti benung mangka pantai nya siti pengasai ti chukup ngelantangka ati sereta ulih muai penusut runding.
Bepalan ba adan Kalimantan Barat entara Malaysia enggau Indonesia, Telok Melano diatu majak maju sereta ditapatka mensia mayuh kelebih agi bala temuai taja jauh ba ujung Sarawak.
Palan nya mega dikelala ngena nama Kilometer 0.00 laban bepalan ba ujung Sarawak.
Kebendar, Telok Melano nya semina sebuah genturung pendiau orang berikan ti bepalan ba adan menua entara Malaysia-Indonesia.
Tebal agi peranak dia semina bepanggai ba jalai tasik dikena ngelawa sebuah pasar ti pemadu semak iya nya Pasar Sematan.
Taja pia, sebana enggau pemedis ditapi komuniti dia udah manggai ba pengujung lebuh Projek Jalai Besai Pan Borneo Utara (LBU) Sematan-Telok Melano mujur tembu penuh lalu dibuka ngagai mensia mayuh kena 26 Janurai 2019.
MULAI PENGINGAT
Mulai pengingat rambau Projek Jalai Besai Pan Borneo Utara (LBU) Sematan-Telok Melano bedau digaga suba, siku Pengelicha Fakulti Jaku enggau Komunikasyen Universiti Malaysia Sarawak (Unimas), Dilah Tuah bekunsika peneleba diri bejalai ari Pasar Semetan ngagai Telok Melano ti chukup mar.
Maya nya, iya benung bejalaika pansik diri ba taun 2019 bekaul rumah temuai ba Telok Melano.
“Sebedau tu, aku nujah pejalai ti mar nengah jalai tasik ngena perau ari pengkalan Sematan ngagai Telok Melano sebedau palan tu bisi akses jalai darat.
“Lebih ngenyinu ke agi, pejalai nengah jalai tasik tu bepanggai ba gaya hari. Enti gaya hari enda manah, panjai agi meh timpuh dikena ngenataika diri ngagai palan ti deka dituju,” ku iya.
Peranak Telok Melano kala madah ngagai iya, enti tasik begelumbang besai, sida nadai chara bukai kelimpah nujah pejalai ti mar agi sereta balat ngasuh lelak iya nya bejalai kaki nengah jalai darat.
Bejalai kaki nengah jalai darat nya ngambi timpuh abis nadai lapan nyentuk 12 jam dikena ngenataika diri ba Telok Melano ari Pasar Sematan.
MATAK TEMUAI
Empas manah ari pengawa ngaga LBU ukai semina ngemuntangka pejalai ngagai Telok Melano tang mujur nukangka pintu jereki ngagai komuniti dia ngaul diri ba pengawa dagang.
Suba, komuniti ti ngelingi Telok Melano agi ngemerat ke ekonomi mit dikena beridup baka betanam betupi enggau berikan.
Dilah madah, komuniti dia agi ngemerat ke pengawa nanam padi bukit, getah sereta berikan ba tasik nangkap ikan, suntung, undang enggau ti bukai.
“Kebendar, ba taun 1986, komuniti ba Telok Melano udah berengkah ngaul diri ba dagang rumah temuai tang sida napi penanggul laban nadai akses kuasa karan.
“Pengudah LBU berengkah dibuka, penatai pemisi komuniti ba Telok Melano majak ngerembai.
Sida berengkah ngalih ari ekonomi mit ngagai dagang rumah temuai,” ku iya.
DAGANG RUMAH TEMUAI
Enti suba, semina sekeda orang aja ulih numbuhka rumah temuai tang diatu pengawa nya baka kulat ti tumbuh pengudah ujan.
Ku Dilah, tebal agi pengempu rumah ba Telok Melano nyeleti rumah sida dikena bejalaika dagang rumah temuai urung baka pemanah rumah temuai ba mengeri.
“Pengudah ngenataika diri ba Telok Melano pengudah bepuluh taun udah enda ngindik kaki ba menua tu, aku chukup temegah meda pemanah rumah temuai ditu.
“Sekeda rumah temuai ti chukup narit ati aku baka Rumah Temuai Fanorama ti diempu Pengajar Asong enggau Rumah Temuai Lentera diempu Pengajar Faizah.
“Kededua rumah temuai tu nyendia servis menyana baka ba hotel betikas bintang.
Sekeda servis bisi disedia dia baka agu dalam bilik, aircond enggau gaya bilik ti lantang,” ku iya.
Diatu kitai ulih meda Telok Melano majak ditapatka mensia mayuh sereta ulih nyadi palan pematak temuai.
Enti kita ngiga palan ti engkeman dikena ngelantang ati begulai enggau diri sebilik tauka orang dikesayau, kita patut napatka Telok Melano ditu seraya nimpai pemanah rampa menua.
