KUCHING: Ulah ti siru, mentas sereta ngenang pengiruh bala ke gawa ba luan lebuh Atur Tagang Pejalai (PKP), siku apai tuai bedaja buah ba kaki lima gerah jari meri buah pisang ke dijual iya ngagai raban polis ke benung gawa ba pos kawalan di Serian, tadi.
Nitihka penerang dibantai ba facebook kemari, pementas enggau penyiru apai tuai ke meri buah pisang pia aja ngagai bala polis gawa dia nerima perati ari penguna media rama.
Taja duit disua kena mayar rega buah nya, tang iya enggai nerima lalu keran madahka diri lurus ati, lalu pemeri nya ke tanda iya ngenang pengiruh enggau pengelelak raban ke gawa.
“Aku nadai niat bukai lebuh meri buah tu ngagai polis ke benung nyaga pengelikun mensia mayuh kelebih agi ke diau semak enggau genturung pendiau tu.
“Tuju aku semina siti aja, dikena ngenang jasa sida ke udah lelak enggau kiruh gawa nentuka kitai ulih diau lantang sereta likun.
“Tambah mega tu aja utai dikemisi lalu ulih diberi aku ngagai kita nyerumba Hari Polis Ke-213,” ku iya madah polis ke bejaga ba pos kawalan semak enggau Kampung Ranchan, Serian.
Piak polis ngasaika pementas apai tuai enggau sida semenua laban pemeri nya mai reti chukup besai ngagai sida sekumbang bejalaika pengawa.
