Tetey ditemu lepas sehari lenyau dalam kampung

LIMBANG: Siku nembiak lelaki ti diripotka lenyau ba kampung dipelaba kena penyakit kemi chit udah ditemu.

Tetey@Erviestey Toyong, 24 taun ari Kampung Kipiku, Tambunan, Sabah udah ditemu pengereja kem batang urung pukul 5 lemai ba Ulu Melaban pengudah sehari iya dipadahka lenyau.

Ketuai Polis Pelilih Limbang, Superitendan Abang Zainal Abidin Abang Ahmad madah, polis nerima ripot bekaul Tetey lenyau urung 10.30 pagi sehari sebedau iya ditemu.

Ku iya, lelaki nya diripotka kena tinggal ari empat iku kaban iya ba ai kerangan Sungai Limbang Ulu Mentawai sepiak kiba 16+400 meter Ulu Mentawai.

“Pejalai nyidi lelaki nya dibagi ngagai dua tim berengkah ba KM 15 ngagai 800 meter Koridor Kanan enggau 300 meter Koridor Kiri di Centre Line Jalai Tubai, Ulu Mentawai, Medamit.

“Raban penyidi bisi tetemuka bekau kaki lelaki nya ba sepiak Koridor Kanan tang lebuh disidi, bekau kaki nya lenyau ba ai kerangan,” ku iya meri penerang.

Abang Zainal madah, bisi 17 iku raban nyidi napi pemar lebuh nujah jalai Centre Line enggau jalai balak bebukit enggau begunaka awak entara sejam setengah ngagau dua jam setengah ngenataika diri ba paip ai bukit Kampung Melaban.

Pengudah tetemuka tudah Tetey tu, iya terus dianjung ngagai Ketuai Genturung Pendiau Melaban enggau bemalam ba Dataran Aras, Kampung Melaban.

Tudah Tetey diatu benung diubat ba Sepital Limbang laban dipelaba kena penyakit kemi chit.