BINTULU: Pengawa masang perengka enggau injin api ungkup projek niri tiang pemanchar Kaunsil Ekonomi Digital Sarawak (SDEC) ba Sungai Segan nyau deka tembu.
Menteri Utiliti enggau Telekomunikasyen, Datuk Seri Julaihi Narawi madah, inisiatif nya mujur nyendia bekal kuasa karan ngagai taba nya.
“Inisiatif pengudah nya baka pengawa masang antena lalu ditangkan pengawa pengatur chara sebedau tiang pemanchar nya ulih dikena penuh.
“Nya alai, pengawa matau projek tu deka seruran dipejalai ngambi pemansang projek ulih ditampung,” ku ADUN Sebuyau nya ba sebengkah penerang UKAS.
Iya mega bepeluang ngatur penemuai gawa ngagai Kampung Samadang Jaya dikena mansik enggau matau pemansang pemadu baru bekaul projek utiliti enggau telekomunikasyen ba sitak nya.
“Pelasar tu patut diambi ngambi infrastruktur utiliti baka bekal ai beresi, kuasa karan enggau rentayan telekomunikasyen lanchar sereta ulih nangkup peminta peranak lokal.
“Pia mega, bemacham insiatif ulih diambi dikena ngemanah ke agi sereta nambah pengawa nyendia utiliti enggau telekomunikasyen tu,” ku iya.
Sama datai nyempulang iya, Sapit Menteri Utilili enggau Telekomunikasyen, Datuk Dr Abdul Rahman Junaidi sereta bala bukai.
