SIBU: Tim nyemerai Para Sukma Malaysia (Sukma) udah nyikap diri ngambi bagi ba pekit nya ke disadang deka diatur di Johor taun 2021.
Pematih tim nyemerai tu, Julius Jaranding madah, sekumbang Atur Tagang Pejalai (PKP), atlit ke diajar iya semina belatih di rumah aja.
“Taja pia tu enda ngasuh kami mantul tang pungka kami udah nyikap diri ngambi bagi ba Para Sukma di Johor taun dudi,” pia ku iya madah ngagai pengarang berita, kemari.
Julius maya tu ngajar 11 iku atlit ianya Rapelson Richard (S6), Salehin Pandeta (Kategori S6), Dominique@ Mohd Fattah Abdullah (S7), Mohd Zamry (S7), Galang Jabai (S7), Donny Sa (S8), Jeffrey Nowel Dana (S8), Emban utik (S9), Safaruddin (S9), Stanley Jaranding (S12) enggau siku atlit baru (S10).
Julius kala ngarika Malaysia ba pekit nya maya ngambi bagi ba renggat Asia enggau dunya.
Kelimpah ari nya, iya diatu tu disaup Jiro Lihap ngajar atlit ke mega kala bulih midul ba pekit renggat menua enggau Asia.
Nambahka jaku iya, Julius mega madahka tim sida bisi ati deka belatih ba Universiti Malaysia Sarawak (Unimas) tang agi nganti pemendar ari opis enggau Opis Menteri ti bekaul.
Berebak enggau tu, iya ngarapka OKU semampai dikemeratka kelimpah sida diberi tanggungpengawa ngembing OKU enda beambi ulih.
“Ngarapka mayuh agi OKU di Sarawak diberi peluang nyadi pematih sereta sida ke megai pengawa matih atlit.
“Terima kasih mega ngagai bala bukai baka Mathew Chin enggau Opis Menteri ti pechaya ke aku sereta bakih OKU ke dikearap nyadi pematih ngagai atlit OKU lebih agi ba pekit lumba nyemerai,” pia ku iya madah baru.
Sarawak kala nyadi champian 13 kali ba timpuh 26 taun berengkah taun 1994, 1996, 1998, 2000, 2002, 2004, 2006, 2008, 2010, 2012, 2014, 2016, enggau 2018.
