Tim Projek Pensel: 16 orang tuai udah nemu macha

SRI AMAN: Tim Projek Pensel nadai kala mantul ati ba pengawa mantu raban diselinting ngulihka penemu ti nadai natak umur.

Ku Pemungkal Projek Pensel Norina Umoi Utot, nipakka tuju sida sebuat numbuhka tim nya kenyau ari 2015 suba ti beratka pekara pelajar ari renggat tumu.

“Enti semua kami semina nyelinting bala nembiak kelebih agi sida ke datai ari ruang bilik seranta.

“Tang diatu kami ngemanjaika agi singkang pengawa, napatka sida ke tuai ti enda ampit besekula.

“Ukai reti kitai ngemaruh tauka ngumbai sida tu buta urup tang kitai deka mai sida belajar macha, nulis enggau ngira, abis nadai sida nemu nyepil nama diri,” ku Norina madah nyemetak.

PUH… Pengajar naka ulih ngajar macha enggau nulis.

Asil pengawa sida sebuat majak dipeda enggau berupai nyulut sereta ngemai pemaik ngagai komuniti kelebih agi sida ke ngulu kelas ungkup orang tuai diatur di Balai Ringin kandang sebulan ke udah.

“Ambika semua bela nemu enggau terang, tim kami udah milih dua buah genturung pendiau endur ngatur kelas orang tuai tu.

“Siti di Kampung Sepan, Balai Ringin lalu siti agi di Kampung Melikin Sungai Gudom di baruh pegai Sri Aman.

“Naka diatu di Kampung Sepan kami bisi nerima 16 iku ngulu kelas tu ke diatur tiga kali seminggu berengkah ari pukul 8 ngagai 9 malam, urung sejam,” ku Norina nerang.

Seraya pengajar ti ngajar kelas orang tuai tu endang volunteer nyengkaum Kepala Pengajar Jessica Liam enggau Pengajar Audie Peter sereta Pengajar Korea.

Ku Norina, Tim Projek Pensel chukup temegah ati meda sukung enggau saup ari semua raban ngemujurka program pelajar ti diatur sida sebuat.

“Kami sebuat beterima kasih ngagai semua ti datai meri sukung enggau besaup enggau kami nentuka pejalai projek tu lanchar.

“Nadai jaku bukai ari aku, semina besampika semua pengawa bala kitai bulih berekat sereta meri asil lalu nyapai juluk nipakka pengeran kitai ngereja pengawa.

“Pengawa baka tu dikedeka kitai, diterenak ngagai rebak baru lalu ditunda sida ke udah teulihka pemujur ngambi tebuka runding pulai ke menua besukung ngangkatka bansa enggau komuniti kitai,” ku Norina nandu.

Norina mega besai amat pengandal mayuh agi raban bukai nyengkaum gempung ukai dikuasa perintah (NGO) enggau sida ti ngatika diri bela besaup ngangkatka bansa enggau menua kelebih agi ba pekara pelajar.

Kebuah pia ku Norina, pelajar tu pugu pekara tauka kunchi besai nuju pengidup menyana sereta ngemansutka bansa kitai ari perekuh penyeranta.