Timpuh nambahka jam program TV Pelajar disukung KGBS

KUCHING: Serakup Pengajar Bumiputera Sarawak (KGBS) nyukung penuh perambu Opis Menteri Pelajar Malaysia (KPM) deka nambahka kerejasama enggau sekeda stesyen televisyen dikena ngemanjaika timpuh jam program TV Pelajar (TVP).
Presiden KGBS Ahmad Malie madahka, serakup nya nyukung pekara tu ketegal TVP nyadi siti medium alternatif ngagai raban pengajar enggau nembiak bejalaika Pengawa Ngajar enggau Belajar di Rumah (PdPR) ti napi penanggul nadai internet.
“Nengah TVP, pengajar enggau nembiak ulih berkomunikasyen pasal pelajar sida.
“Pia mega, nambahka timpuh program TVP tu, KGBS pechaya pekara nya ulih meri peluang ngagai nembiak ti napi penanggul nadai internet kelimpah lebih muntang,” ku iya dalam siti penerang media, kemari.
Ku iya, TVP muntang agi datai ngagai mayuh palan kelebih agi menua pesisir sereta kampung.
“TVP tu audio visual ti kreatif lalu ulih narit ati nembiak lebuh nitihka PdPR.
“Kelimpah ari nya, program tu nadai nating apai indai tauka penyaga ngerua belanja laban diatu semua ruang bilik udah ngembuan televisyen ba rumah enti dibanding enggau line internet,” ku iya.
Berebak enggau nya, Ahmad Malie mega merambu ngambika program ti dipandang ba TVP diatur ninting hari lalu meri fokus ngagai kelas ‘Tahap Satu’ sekula primari.
“Kebuah pia, laban nembiak ba tikas tu agi bedau nemu tauka bepeneleba nitihka PdPR kediri ti ngujungka sida tebal agi bepanggai ngagai apai indai.
“Nembiak tikas tu mega dianggap tikas ti pemadu kritikal dalam sistem belajar laban enti ulih nembiak ba tikas tu mesti nguasa penemu minimal baka macha, nulis enggau ngira.
“Nya alai, program ulang baru patut dipandangka dikena nembiak nitihka baru pelajar ti tinggal kelimpah lebih mereti pekera ti disampaika,” ku iya.
Dulu ari nya, KPM merambu deka nambahka kerejasama enggau sekeda stesen televisyen bagi ngemanjaika timpuh program TVP.
Ketuai Direktor Opis Pelajar Datuk Dr Habibah Abdul Rahim madahka pekara tu berindik ari 90 peratus rumah di selampur menua udah ngembuan televisyen lalu ngujungka program TVP ulih dikerembai luas.